يضرب الحب شو بيذل ..!!

الكل يتفق ان الحـــب شي جميل وهو تلبيه لمشاعر فطريه فينا احنا البشر ..





واساس الدنيا قايم على حب ..( حب ربي وحب نفسي وحب ديني وحب وطني وحب نفسي ووو حتى غرفتي ويمكن جزء من البيت وووو غيره


اذا الحب يحيط بنا ..


يمكن بتقولون لي لا البيت والاشيا مانعتبرها حب نعتبرها شي مفضل ومن باب التفضيل فقط


يمكن يكون هالكلام صحيح .. لكن احيانا ترتبطين بالمكان واذا فارقتيه تحسين بحزن عليه وكانه شي منك .


عارفه انه خطر ببالكم اغنيه الاماكن


المهم الحب اللي بتناقش فيه هو حب الاشخاص البشر ..


لما نكون اطفال .. كل شي نحبه وقلوبنا بيضا ..


لكن فجاه لما نمر بمرحله المراهقه تنقلب الموازنين !!


يصير حبا اكثر تعقيد .. يانحب الشي ونجي كلنا جميع .. يانكره الشي احيانا بدون سببب ونكره من قلب وبعناد بعد .


في هالمرحله البناات بالذات يلاحظون تغييير !!


انه صارو يصنفون الناس اكثر من قبل .. صارت تقول فلانه حقوده !! فلانه طيبه وفلانه وفلانه وهات ياتصنيفات



وصار انه تكثر المشاكل بين الشلل وتتفرق الصاحبات بدون سبب قوي كلها اخذ وعطا ومناوشات ماتستاهل تفترقون !!


وصارت تشوف المراهقه قد ايش امها تعاني مع ابوها او العكس !! قديش خالاتها او عماتها يتدخلون بحياتهم


وصارت تلاحظ اشياء ماكانت تلاحظها قبل ..


اشياء كثيره مابي اقلب الموضوع عن المراهقه ..


لكن اللي يهمني هنا انه كل مراهقه بتفكر شوي وبتقول صح انا اول لاهيه وماهمني شي الحين صرت ادقق بعلاقاتي باهلي .. ياانها تهتم باهلها ياانها تصادمهم وتحس انهم معقدين وتبي تنتحر




صارت حساسه اكثر ..




طيب قبل ماكنتي تفكرين كذا صح ؟


بتقولين طبيعي كبرت !!


ايوه برافو عليك انتي كبرتي صح .. فلازم تنتبهين وش يعنني كبرت ؟ وش يعني تغيرت ؟



كبرت يعني صرت افكر بطريقه معقده ( التعقيد يعني بتفصيل اكثر ) اكثر من قبل . صرت ادقق اكثر من قبل .. برزت بالمجتمع وبالدنيا اكثر من قبل
والاهم نمت مشاعري العاطفيه ..
وهذي نقطه التنوير باللحديث كله


مشاعرك ياعزيزتي البنوته الجميله ..



ليش بس الحين صرتي تحسين انه لازم تحبين ؟ \


ليش الحين صرتي تحسن بميل للشباب وودك تلفتين انتباههم .. اما بانك دلوعه .. او بكثره الجراءه عندك .. او اني ملكعه وخفيفه دم ..


ليش صار عندك رغبه دفينه بمعرفه سؤال .. هل انا حلوه ؟ هل انا مغريه وممكن اجذب اي شاب ؟


ليش البنات بهالعمر يهتمون بالاغاني الرومانسيه ويطيحون فجاه بحب اليسا .. وخالد عبدالرحمن وغيره
او كنتي تسمعين نانسي والاغاني الفرايحيه .


ليش الحين صرتي تستمتعين بالحزن اكثر ؟ بالحب اكثر تحسين انه هو اللي ياثر فيك اكثر ؟ يعبر عن شعورك


مثل ماقلت لك ياقلبي انتي .. انه كبرتي فنمت عندك المشاعر العاطفيه اكبر ..


ولان هالمشاعر جديده طبيعي بتكون قويه واكثر حده .. وتدفعك احيانا للغلط وانتي مغمضه !!


طيب يعني قبل انا ماعندي مشاعر ؟


الا عندك بس ماكانت بالشكل الموسع زي الحين .. اول مشاعرك داخل بيتكم داخل مدرستك بايطار محدود ..


الحين لا مشاعرك مالها سقف ..


تلاقينك ترددين الله ودي احد يحبني .. يقول امووت على فلانه .. يالله ودي احد يشوفني كل حياته .. ودي احد يتغزل فيني ودي ودي ..



ولان هالمشاعر عندك فايضه فانتي تستقبلين أي رساله حتى لو كانت عشوائيه من الشباب انهم يقصدونك وانه اااه طاح بغرامك



يالعنود انتي ماتفهمين وربي انه عجز يلتفت عني .. صار يلاحقني .. حتى انه ماكمل كوب القهوه اللي بيده ..


ياحبيبتي المشاهد للمشهد من بعيد بيشوف ان تصرفات الشاب طبيعيه جدا بس لانك عندك تحضير رومانسي مسبق فجيتي طبقتيه على الشاب المذكور اعلاه وهو لاحظ تصرفاتك فاستغل الموقف


ورحتي للبيت وقعدتي تحوسين بمنامك وتفكير .. ياربي هل انا اعجبته؟ الحين هو وش يسوي ؟ تتوقعين يفكر فيني ؟


واخونا الشاب راح تعشى عن ربعه ورجع ينام ويمكن انه مافرش اسنانه بعد


انتي ليش تستهينين بمشاعري ومخليتني غبيه وعلى مهب الريح انا بنت فاهمه بس وربي حسيت بشعور غريب يوم شفته ووووو


انا فاهمتك عزيزتي لكن انتي غايصه لحد اذانك بمسلسلات الحب الخياليه اللي تشوفينها كل يوم بعقلك ونمو مشاعرك بشكل جياش لذالك انتي مهيئه للقصه تماما باي لحظه فقط ناقص البطل !!


بمرحله المراهقه بين الشاب والبنت تتشابه تقريبا في كثير من جوانبها لكن بالناحيه العاطفيه تختلف نوعا ما ..


يعني البنت تنمو عاطفيا بشكل جياش ويصاحبها نمو جنسي لكن مغلف بعاطفه ورمانسيه


الولد .. نمو جنسي طاغي .. وخيالات رومانسيه بقالب جنسي ..


بتكلم باكثر توضيح علشان الفائده ولا حياء بالعلم ..


الولد بمرحله المراهقه تبرز عنده الرغبه الجنسيه بشكل طاغي .. هو بالبدايه لايفهم ماحدث له ..


لذالك تلاقين اغلب الاولاد يكونون بهذي الفتره يستحون من الحريم كثير ..


لان خيالاته الجنسيه تاسره فيحس ان الحريم يدرون فيه فيستحي ويتهرب منهم !!


يحاول فهم هذا الشي .. مع اني عارفه انكم بتفولون العيال الحين فاهمين كل شي مايحتاج


اقولك صح


لكن صدقوني هالبلوغ مرحله مربكه للولد تلاقينه يبحث عن تفسيرات للخيالات الجنسيه اللي تراوده


فكثير من البنات تقول وهي مصدومه انها لقت مقاطع جنسيه بجوال اخوي او بالاب توب !!
اخوي مؤدب وربي مايعرف كذا وعمره 15 او 16 ..


اقولك صح انه حرام ومن هالحكي لكن هالشي طبيعي .. اخوك يمر بمرحله جنسيه عنيفه تتحول حياته لضغوط جنسيه كبيره .


لذالك بهذا المرحله يكون فيه ميل نحو الانثى والبحث عنها ..


تلاقينه يهتم بشكله واناقته ووو ..


وتلاقينه يدخل شات او اماكن يدور بنات .. ويمكن يتعرف على وحده ويجيها مره وحده بالعاطفه والحب ويمكن يحبها صدق !!


لكن حبه هنا مش حب ناضج عقلاني لا حبه للانثى لان وجودها يلبي حاجه عنده ..


البنت نفسي الشي تبحث عن الذكر لكن بقالب حالم ورومانسي وانها بتعيش معاه قصه رومانسيه وبتنتهي بالزواج .




يعني البنت تحب للاحلام


الولد يحب للجنس !!


عارفه بتعارضوني وبتقولون لا والولد له قلب ويحس ووو اقولك صح .. لكن الرجل اذا احب مابطولها يجيك لباب بيتك علطول الرجل عملي جدا ..


ومشكله البنت انها تعيش احلام وقصاصات من اشعار رومانسيه ومقطوعات من اغاني .. وتكون جاهزه لاي عابث يعبث فيها باسم الحب


اقولها همسه باذنك .. الحب مواقف !!


اذا كانت هناك مواقف اثبتت لك ان ذاك الشخص يحبك مواقف تستحق هنا اقولك فعلا الحب قائم


اما حكي ووعود مستقبليه صدقيني غيرك اكلوها .. وضاعت حياتهم بسبب كلام في مهب الريح ..


ملخص الكلام ياعزيزتي الفتاه ..



افهمي نفسك اولا وافهمي الرجل ثانيا ..


اقراي عن الرجل وعن طبيعه خلقته .. لا تعاملينه كانه انثى لالا هو مختلف تماما ..


تفسير الحب عند الرجل هو غير تفسيرك ايتها الفتاه ..


نموه وتفكيره وحاجاته ..

نحن نجهل الرجل .. لانها بهالزمن انشغلنا عن بعض كثير مافي لمه واحتكاك مع اخوننا والاباء .. علشان نفهم الرجل واختلافه ..

لما كان اخوي يقول لي تغطي بالسوق .. والرجال فيهم وفيهم .. كنت اظنه معقد ومتشدد ..
لكني فهمت بعدين انه افهم مني بالرجال وطبيعتهم لانه رجل !!





ارجوك لا تجين بالعمى تحت مسمى الحاجه للحب وتهدمين حياتك ..


ايه انا اشعر برغبه للحب وانتي وهي كلنا .. طبيعه الانثى عاطفيه بل العاطفه هي تكوينها


لكن لاتخلين احد يذلك باسم العاطفه ارجوك ..



اعرفي انه تمرين بمرحله مراهقه لذالك اجلي مشاعر الحب .. لاتقولين غصب ..لالا خليك واعيه


لاتصيرين فاضيه انشغلي بدراستك .. ببناء نفسك .. اقري ابدعي اجلي الحب شوي لحد ماتكبرين وينضج عقلك ومشاعرك ..


صدقيني علشانك علشان ماتنصدمين علشان ماتدمرين حياتك ..




ثاني شي ..


مهما حبيتي احد احرصي دائما تخلقين مساحه بينك وبينه .


حتى لو كان زوجك او صديقتك .. هالمساحه بتحميك ..


يعني حبي زوجك ايه استمتعي بالحب الحلال .. لكن لا تموعين لا تتلاشين قدامه .. لا تجين كلك .. ابدا .. خلي مساحه لك خاصه


تستوعب انه قد يجيك خطا منه فيهز كيانك .. هالمساحه بتحميك ..


لاتجين وتقولين يالعنود انا ضحيت بنفسي .. ياالعنود انا احب اللي يحب واكره اللي يكره .. ياالعنود انا ناسيه نفسي وصايره مااشوف الا هو




لالالا صدقيني هذا خطا .. لان الحب اولويات ..


اولويات الحب ( حب ربي + حب نفسي + حب اولادي + حب اهلي + حب زوجي )






اولها تحبين ربك




يعني شلون .؟




يعني هاللي تحبينه لو امرك بمعصيه لا تطيعينه لانك تحبين الله اكثر .. يعني انه ماتنشغلين عن ربك بهاللي تحبينه نهائي ..




بعدها تحبين نفسك .. انتي فلانه قبل العرس وبعده نفس الاشيا اللي تحبينها نفس الافكار ..


صح انه بيتغير اشياء طبيعي لان حياتك تغيرت .. لكن لاتمسحين نفسك من الوجود علشان بس تزوجتي وتحبين زوجك !!






تحبينه ايه بس مايمنع انك لراي خاص لك ذوق خاص .. وهذا سر التكامل بالحياه الزوجيه لو كنتو متشابهين صارت الحياه ملل !!


طيب هالمساحه وش فايدتها .. انه لاسمح الله زوجك كذب عليك صارت مشكله خانك لاسمح الله ..


ماتتحطمين وتضيق بك الدنيا بس لانك كنتي مدرعمه معاه وناسيه حالك فجاه عطاك كف صحيتي من بعده !!


خليك صاحيه من البدايه ..


مااقول افترضي سوء النيه بزوجك لالا .. بس احمي نفسك من أي طارئ يكون ومافي حياه بدون مشاكل !




مع صديقتك ..


يالعنود احبها وربي مثل اختي لحد غرفه نومي تدخلها مابيننا اشيا بس تخيلي سوت هالموقف البايخ !!


تزوجت ابتعدت تفارقنا انا حاسه بالم فضيع وحزن ووو!!




ليش ؟


ليش هالالتصاق العجيب .. ايه تحبينها الله يزيدكم لكن توقعي دائما انه ممكن يحدث شي . اقلها تموت مثلا !


مابي اكون سيئه بس وربي احيانا نكون عميانين ومانفتح عيوننا الا بوقوع الصدمه



بعدها عاد تعاالو وتعالجو اكتئاب امراض مزمنه وغيرها !!


ليش لاننا مانفكر طويلا بالامور لاننا نفيض مشاعر ونخليها تقودنا بدون أي كنترول ..


حتى امك وابوك وكل الناس لا تعلقين فيهم لحد العمى .. حبيهم احترميهم كل شي مااختلف معك لكن توقعي خسارتهم


اذا حستي بهذا الشعور فعلا .. بتكونين اكثر وعي اكثر صبر عند حدوث المشاكل .. اقل امراض نفسيه ..


اكثر تعلق بالله لانك بالنهايه تؤمنين حق الايمان ان الله الباقي ومن سواه سيفنى .. بيكون ايمانك مالي قلبك وبتكونين اقوى .. واصفى ذهن وعقل ..




ملخص الحديث



حبيبتي المراهقه افهمي نفسك .. والتغيرات اللي صارت لك لا يمنع ابدا تقرين عن المراهقه بتحلين اغلب مشاكلك بنفسك لانك باختصار فهمتي نفسك !



افهمي طبيعه الرجل قبل تحبينه .. وكيف تقديمه للحب .. وعامليه كرجل مش تعاملينه كانه وحده من البنات ..!


لا تحبين احد حب اعمى سوى الله .. اخلقي مساحه فاصله دائما بينك وبين الاخرين ..



* لكل ام ..


ارجوك انتبهي لبنتك وافهمي انها تمر بمرحله حساسه جدا كوني اكثر وعي معها


ان اخطات فالخطا خطاك انتي غافله عنها ..


مااقول صكي عليها ولا تعطينها ثقه ووو من اساليب القسوه اللي تزيد المشكله

لا احتويها عاطفيا .. اشغليها بالاهتمام بنفسها وبجمالها امدحيها كثير ..

عطيها مسؤوليات تنشغل فيها .. الفراغ هو سبب المشاكل كلها
خليها تهتم باخوانها .. تشاركك الاهتمام بالعائله باي تطوير او مشكله تعانون منها
اقعدي معها حاوريها .. فهميها وش يعني انها مراهقه ؟ وش الاشياء اللي بتمر فيها
كوني اقرب لها من صديقاتها .. علشان تحمينها وتكون قويه بوجودك معها .
ناقشيها بالامور الجنسيه بقالب هي تفهمه ..
ارجوك لا تخلينها تعتمد على صديقاتها او من مصادر غلط .. فهميها انتي ..
لاتفسين عليها انتي الام الاعقل والافهم والاكثر تجربه بالحياه ..
مريتي باللي هي تمر فيه لذالك استوعبيها .. تحملي اي تصرف منها
بالنهايه هي بنتك وصلاحها يضيف لسعادتك .. وفسادها لا سمح الله هو مصيبه لك لذالك كوني اكثر وعي

يعني البنت تحب للاحلام


الولد يحب للجنس !!


هع ـآمـآآآ

وربي الكلآم صحيح 100%

موضووع قمــه في الخطنطيييير

د ـآآئمـآآ مبدعه في مانتقـآئك المواضييع

ماننحرم من جديدكـ اللميز .,.ْ~